စင်ကပူ Changi လေယာဉ်ကွင်းထဲက မြန်မာသတင်းစာ (ရေးသူမသိပါ)

စင်ကပူ Changi လေယာဉ်ကွင်းထဲက မြန်မာသတင်းစာ
----------------------------------
နိုင်ငံတကာက လေယာဉ်တွေ အမြားအပြား(အများအပြား) ဆင်းတဲ့ Changi လေယာဉ်ကွင်းထဲမှာ လူမျိုးပေါင်း အတော်စုံသလောက်ပါပဲ။ Airlines ကလည်း အစုံရှိသလို သစ်ပင်စိုက်၊ မြက်ရိတ်၊ အမှိုက်သိမ်း၊ ပန်းအလှပြင်၊ လမ်းခင်း/ပြင်၊ အဲကွန်း၊ ဆောက်လုပ်ရေး၊ ဝါယာရိန်း၊ ဆေးသုတ်တို့အပြင် Position အစုံနဲ့ လူမျိုးပေါင်းစုံ အလုပ်လုပ်နေကြတာပါ။ Canteen ၊ Duty Free ၊ Cargo ငှာန ၊ Mail ငှာနနဲ့ Baggage Unit တို့မှာလည်းရှိကြပြီး အားလုံးက ကိုယ့်အတွေ့အကြုံနဲ့ ကိုယ်ပါပဲ။
ဒါပေမယ့် အားလုံးက သူ့ Pass နဲ့သူမို့ ကွင်းထဲကိုတော့ လာလို့မရပါဘူး။ အဲဒီထဲကမှ လူမျိုး ၇/၈ မျိုးလောက်က Apron မှာ Ramp Services လုပ်ကြပါတယ်။ (ကျနော်တို့ကတော့ အတိအကျပြောရရင် လေယာဉ်မှာ Operation လုပ်တာပါ) အများဆုံးကတော့ စလုံး၊ မလေးနဲ့ ပြည်ကြီးတရုတ်တွေဖြစ်ပြီး မြန်မာကတော့ သိပ်မရှိခဲ့ပါဘူး။
Apron ထဲက Staff အားလုံးနီးပါးက မိမိတိုင်းပြည်ကလာတဲ့ လေယာဉ် ပြန်သွားပြီးတဲ့နောက်မှာ လေယာဉ်က ပြစ်ချခဲ့တဲ့ အမှိုက်ထုပ်ထဲက သတင်းစာကို ကောက်ယူဖတ်လေ့ ရှိကြပါတယ်(အလွမ်းဖြေကြတယ်ပေါ့ဗျာ... အားလုံးက ရပ်ဝေးမှာ ရောက်နေတာလေ)။ လေယာဉ်မှာ တာဝန်ကျတဲ့ရဲတောင် တခါတရံမှာ အလွယ်တကူ ကောက်ယူသွားတာမျိုး တွေ့ဖူးပါတယ်။ အားလုံးက ရုံးထဲကို ယူလာပြီး အေးဆေးဖတ်ကြတယ်။ ဒါက Changi Airport ထဲက နိုင်ငံသားအစုံရဲ့ လူနေမှုဘဝ တစ်စိတ်တစ်ပိုင်းပါ။
လေယာဉ်တွေကလည်း နေ့တိုင်း အသွားအပြန် လုပ်နေတာဆိုတော့ နေ့စဉ်သတင်းစာက အမှိုက်ထုပ်ထဲမှာ အမြဲပါပါတယ်။ ပါတာမှ သတင်းစာတွေအတွက် ပလပ်စတစ်အိပ် အကြီးကြီးနဲ့ သီးသန့်ထုပ်ပြီး ပစ်ထားခဲ့ကြတာမျိုးပါ။ အဲဒါကြောင့် လေယာဉ်ပေါ်က ခရီးသည်တွေရဲ့ အနည်းဆုံး ၃၅% က သတင်းစာဖတ်ကြတယ်လို့ အမှိုက်ထုပ်ကိုကြည့်ပြီး ခန့်မှန်းလို့ရပါတယ်။
ပြီးတော့လည်း ရုံးထဲမှာ လူမျိုးပေါင်းစုံတော့ အမှိုက်ထုပ်က ကောက်လာတဲ့ သတင်းစာကလည်း မြန်မာသတင်းစာကလွဲပြီး အစုံရှိပါတယ်။ သူတို့ သတင်းစာတွေ အားလုံးက ဆေးရောင်ပါပြီး မြန်မာသတင်းစာထက် ပိုကြီးတယ်။ ဘယ်သတင်းစာပဲဖြစ်ဖြစ် နားမလည်လည်း စိတ်ဝင်စားတဲ့ သတင်းဓာတ်ပုံ တွေ့ခဲ့ရင် မေးမြန်းကြပုံကလည်း အမြဲမြင်တွေ့နေကျ မြင်ကွင်းတစ်ခုပါ။ အဲလိုမေးခဲ့ရင်လည်း စိတ်ရှည်ရှည်နဲ့ ရှင်းပြကြလေ့ ရှိပါတယ်။ ဒါဟာလည်း အချိန်တန်ရင် အိမ်ပြန်ကြမယ့် သူတွေဖြစ်လို့ အားလုံးက ခင်မင်ရင်းနှီးစွာ ပေါင်းသင်းဆက်ဆံကြတာပါ။ အဲဒါကြောင့်... သတင်းကလည်း အစုံကြားရသလို လူမျိုးတိုင်းက သတင်းစာကို စိတ်ဝင်တစား ဖတ်ကြတယ်ဆိုတာ အမြဲမြင်တွေ့နိုင်ပါတယ်။
ရုံးထဲမှာ နီပေါလူမျိုး သန့်ရှင်းရေးသမား ညီကိုနှစ်ယောက်နဲ့ စလုံးအဖွားအိုကြီး တစ်ယောက်ရှိတယ်။( အလှည့်ကျ တာဝန်နဲ့ပေါ့) အဖွားကြီးက အလုပ်မလုပ်နိုင်ပေမယ့် ကြာဇံထုပ်ရောင်းပြီး အပိုဝင်ငွေရှာတယ်။ သူ့အလှည့်မှာ စားပွဲပေါ်က သတင်းစာတွေ ရှင်းပေးရုံကလွဲပြီး ဘာမှမလုပ်ဘဲ ကြာဇံထုပ်ရောင်းတယ်။ အဲဒါလည်း အလုပ်တစ်ခုမှာ တည်မြဲနေခြင်းက သူ့နိုင်ငံသား အခွင့်အရေးပဲလေ။ သူတို့ Favour ပေးထားတယ်။ အသက်ကြီးလို့ အလုပ်မလုပ်နိုင်တာတောင် သူ့နိုင်ငံသားက အလုပ်လုပ်ခွင့်ကို ရစေတယ်။( လုပ်နိုင်တဲ့သူနဲ့ ရောထည့်ပေးထားတယ် ) ဒီအကြောင်းက လူ့အခွင့်အရေး၊ နိုင်ငံသားတစ်ယောက်ရဲ့ အခွင့်အရေးကို သူများတိုင်းပြည်မှာ ဘယ်လိုဆိုတာကို သိစေချင်လို့ ထည့်ပြောရတာပါ။
အဲလိုနဲ့ သန့်ရှင်းရေးသမားက နေ့စဉ် ရုံးထဲက သတင်းစာတွေကို လိုက်သိမ်းရင်း မြန်မာသတင်းစာကို မတွေ့ဘူးသေးကြောင်း မြင်ဖူးချင်ကြောင်း ပြောလာခဲ့တယ်။ အဲဒါလည်း သူကရိုးရိုးပြောတာပါ။ ဒါပေမယ့် သူက လူတွေ့တိုင်း ဒါပဲမေးနေခဲ့တာ။ (သူက မြန်မာတွေထက် လုပ်သက်လည်း ပိုများပါတယ်) အဲလိုနဲ့ သူက အစပြုခဲ့တဲ့ သာမာန်မေးခွန်းတစ်ခုကို အားလုံးက သတိထားမိသွားပြီး Apron တစ်ခုလုံးမှာ အတော်လေး ကျယ်ပြန့်လာခဲ့ပါတယ်။ ကျနော်တော့ အဲလောက်တောင် ဖြစ်လာလိမ့်မယ်လို့ လုံးဝထင်မထားမိခဲ့ပါဘူး။
သူတို့အမြင်မှာ မြန်မာတွေက ယဉ်ကျေးပြီး ကြီးသူကို ရိုသေတတ်ကြတယ်။ ဘာမဆို အလွယ်တကူ သင်ယူတတ်မြောက်လွယ်ရုံမက အလုပ်ကျိုးစားပြီး စာရိတ္တကောင်းမွန်ကြတယ်လို့ လက်ခံထားကြပါတယ်။ သူတို့ အဲလို နားလည်ထားတဲ့သူတွေက သတင်းစာမဖတ်ခြင်းကို အတော်လေး စိတ်ဝင်စားနေကြပုံပါ။
အဲဒီက အစပြုပြီး... ကျနော်တို့ကို အခွင့်သင့်တိုင်း ရိုးစင်းပြီး ဖြေရန်ခက်ခဲတဲ့ မေးခွန်းမျိုးတွေ မေးတတ်ကြပါတော့တယ်။ ကျနော်တို့ကို စိတ်ဝင်စားသောကြောင့်လည်း ဖြစ်နိုင်ပါတယ်။ အဲဒါဘာလည်းဆိုရင် " မင်းတို့ သတင်းစာ မဖတ်ဘူးလား?။ ငါတို့နဲ့ အလုပ်တူတူ လုပ်လာခဲ့တာ ကြာခဲ့ပြီ။ ဒါပေမယ့် မြန်မာတွေ သတင်းစာဖတ်တာ မမြင်ဖူးသေးဘူး။ ဘာလို့ သတင်းစာ မဖတ်ကြတာလဲ? " ဆိုပြီး မေးခွန်းထုတ်လာခဲ့ပါတယ်။ အဲဒီအချိန်မှာ ကျနော့ရဲ့ လုပ်သက်က လေးနှစ်ရှိနေခဲ့ပါပြီ။
ပြီးတော့ မြန်မာလေယာဉ်က အမှိုက်ထုပ်ထဲမှာ သတင်းစာ ပါလာတာ မတွေ့ဘူးသေးလို့ မြန်မာပြည်မှာ သတင်းစာ ရှိလားလို့တောင် မေးလာပါတယ်။ စင်ကပူကို လာတဲ့မြန်မာတွေက အတော်လေး များပေမယ့် သတင်းစာတစ်စောင်တောင် ခုချိန်ထိ သူတို့မမြင်ဘူးသေးတာ( အမှိုက်ထုပ်ထဲမှာ ) ခရီးသည်တွေကလည်း သတင်းစာ မဖတ်လို့ပေါ့တဲ့။ ပြီးတော့လည်း သတင်းစာ တစ်စောင်ကို အလုပ်ရှုပ်ခံပြီး သယ်သွားမည် မဟုတ်ကြောင်းနဲ့ သူတို့သာဖတ်ရင် အမှိုက်ထုတ်ထဲမှာ တွေ့မည်ဖြစ်ကြောင်း ခိုင်ခိုင်မာမာနဲ့ကို စိတ်ဝင်တစား မေးခွန်းထုတ်နေတော့တာပါ။
အဲဒီအချိန်က ကျနော်တို့အားလုံး ဝင်ငွေလည်းကောင်းပြီး အလုပ်လုပ်ရတာ အဆင်ပြေနေခဲ့ပေမယ့် မြန်မာသတင်းစာ တစ်စောင်ကြောင့် အတော်လေး အာရုံနောက်ခဲ့ရပါတယ်။ မြန်မာလေယာဉ်မှာ တာဝန်ကျတိုင်း အမေးခံနေရလို့ပါ။ ဒီလိုနဲ့ ဘာမှမဟုတ်ဘူးလို့ ထင်ခဲ့တဲ့ အဲဒီမေးခွန်းက Changi Airport ထဲမှာ အတော်လေး ရေပန်းစားလာခဲ့ပါတယ်။ ဘာမှမဟုတ်ဘဲနဲ့ မေးခွန်းက အသက်ဝင်လာတယ်ပေါ့ဗျာ။
သူငယ်ချင်း တစ်ယောက်ဆို အမေးမခံနိုင်တော့လို့ ထင်ပါတယ်။ လေယာဉ်အတွင်းပိုင်း နံရံမှာစာရေးပြီး " ဟိတ်ကောင်တွေ သတင်းစာတစ်စောင် ထည့်ပေးလိုက်ပါဟ" လို့ရေးပြီး ရန်ကုန်လေဆိပ်က ဘယ်သူပဲတွေ့တွေ့လို့ ရည်ရွယ်ပြီး စာရေးပေးရတဲ့ အနေအထားမျိုးတောင် ရှိခဲ့ပါတယ်။ ဒါပေမယ့် သတင်းစာကတော့ ရောက်မလာခဲ့ပါဘူး။ သူတို့မတွေ့တာလည်း ဖြစ်နိုင်ပါတယ်။ ပြီးတော့... မြန်မာလေယာဉ်ကလည်း သူ့ရဲ့လေကြောင်းလိုင်း အောင်မြင်လာခဲ့လို့ တစ်နေ့တစ်ခေါက်ကနေ နှစ်ခေါက်ပြေးဆွဲတဲ့အထိ ဖြစ်လာခဲ့ပေမယ့် စွန့်ပစ်တဲ့ သတင်းစာက တစ်စောင်တောင် ပါမလာခဲ့ပါဘူး။
အဲဒီအချိန်ကစပြီး ကျနော်တို့တွေဟာ မြန်မာလေယာဉ်မှာ တာဝန်မကျခဲ့လည်း လေယာဉ်က ပြစ်ချခဲ့တဲ့ အမှိုက်ထုပ်နားမှာ ပေါ်ပေါ်ထင်ထင် မဟုတ်ဘဲ ဟိုလိုလို... ဒီလိုလို ပုံစံအမျိုးမျိုး ဖန်တီးပြီး သတင်းစာ ပါလိမ့်မလားဆိုတဲ့ မျှော်လင့်ချက်မျိုးနဲ့ တဝဲလည်လည် ဖြစ်ခဲ့ရပါတော့တယ်။ ဒါတင်မကသေးဘဲ ထွက်ခွါလေယာဉ်မှာ Aerobridge(လေယာဉ်ပေါ်တက်တဲ့ ချဉ်းကပ်တံတားရှင်) ပေါ်က စောင့်ပြီး ညီကိုမောင်နှမအချို့အား စလုံးကို ပြန်လာရင် သတင်းစာတစ်စောင် ယူလာခဲ့ပေးဖို့နဲ့ ယူလာခဲ့ရင်လည်း Aerobridge ပေါ်က ရဲကိုပေးခဲ့ဖို့ အဆင်ပြေသလို မှာခဲ့ဖူးကြပါတယ်။ (ဒီပို့စ်ကို တွေ့သူတွေကတော့ ဒီအဖြစ်ကို သတိရသွားပါလိမ့်မယ်) ဒါပေမယ့် သတင်းစာက လုံးဝကို ပါမလာခဲ့တာပါ။ သူတို့တွေလည်း သာမာန်လို့ပဲ အောက်မေ့မိလို့ ဖြစ်ကောင်းဖြစ်မှာပါ။ ပြီးတော့ ကျနော်တို့တွေကလည်း အလည်ပြန်ဖို့ ခွင့်ရက်က အဆင်မပြေသေးတဲ့ အချိန်မျိုး ဖြစ်နေခဲ့တယ်။
စလုံးရောက် ညီကိုမောင်နှမ များကတော့ ကျနော်တို့ရဲ့ အဖြစ်ကို မသိနိုင်သလို သူတို့နဲ့ ကျနော်တို့ရဲ့ ပတ်ဝန်းကျင်ကလည်း လုံးဝကွဲပြားနေတာမျိုးပါ။ အဲလိုအဖြစ်မျိုးကလည်း ရီစရာအလွန်ကောင်းတဲ့ ဖြစ်ရပ်တစ်ခုအဖြစ် အမှတ်တရ ဖြစ်နေလျှက်ပါ။
တစ်နေ့ ရုံးထဲမှာ Flight မသွားခင် မြန်မာလေယာဉ်က ပြန်လာတဲ့ မြန်မာတစ်ယောက်က စားပွဲပေါ်ကို "မြန်မာ့အလင်း" သတင်းစာတစ်စောင် ပြစ်ချပြီး ပြောလိုက်ပါတယ်။ " ရော့! မင်းတို့ရှာနေတဲ့ သတင်းစာတဲ့။ ဟို... မြေယိုးတွေကို ပြလိုက်လို့ ပြောပြီး ငါတို့ဒုက္ခကလည်း ကြီးလိုက်တာကွာလို့ ငြီးပြရင်း " အားရပါးရ ရီနေပါတော့တယ်။ သတင်းစာ ကောက်လာတဲ့ သူငယ်ချင်းနဲ့ လေယာဉ်ပေါ်က လွှင့်ပစ်လိုက်တဲ့သူကိုတော့ ကျေးဇူးတင်မဆုံးပေါ့...
သူတို့တွေ မြန်မာသတင်းစာကို မြင်ဖူးသွားပြန်တော့ သူတို့အမြင်တွေကိုပြောရင်း ဝေဖန်ကြပါတယ်။ မြန်မာစာလုံးက စက်ဝိုင်းလေးတွေကို စုပေါင်းပြီး ဖွဲ့စည်းထားတာဖြစ်လို့ အင်မတန်ရှုပ်ထွေးကြောင်းနဲ့ ဖတ်ရခက်လို့ မြန်မာတွေ သတင်းစာမဖတ်တာလားလို့ မေးပါတယ်။ သူတို့အမေးကို စိတ်မဆိုးပါဘူး။ မြန်မာမှာ လူမျိုး၊ ဘာသာ၊ ဂီတနဲ့ ကိုယ်ပိုင်စာရှိကြောင်း ရှင်းပြရတယ်။ အဲဒါဆို... သတင်းစာမှာ ဘာတွေရေးထားလို့ လူတွေက မဖတ်တာလည်းလို့ ထပ်ဆင့်ပြီး မေးလာပါတယ်။ ကာလာမပါတဲ့ အကြောင်းနဲ့ သတင်းစာအရွယ် သေးကြောင်းကိုလည်း ပြောပါတယ်။ ပြီးတော့ မြန်မာပြည် လူဦးရေနဲ့ သတင်းစာရဲ့ စာမျက်နှာက ကွာဟတယ်လို့ သူတို့အမြင်ကို ပြောပါတယ်။ လူဦးရေများပြီး သတင်းစာပါးတယ်လို့ ဆိုလိုနေတာပါ။
သူတို့မေးနေတာက ရိုးသားပြီး လေးနက်တဲ့အတွက် အလွယ်ဆုံး စကားလုံးတွေသုံးပြီး တတ်နိုင်သလောက် ရှင်းပြရပါတယ်။ မြန်မာသတင်းစာရဲ့ သက်တမ်းက နှစ်ပေါင်း ၉၀ ကျော် ၁၀၀ ဝန်းကျင်လောက် ရှိပေမယ့် စစ်အုပ်ချုပ်ရေး ခေတ်တုန်းက အရမ်းတော်တဲ့ သတင်းစာ ဆရာကြီးတွေက ထောင်ကျပြီး ၊ တချို့လည်း ပြည်ပကို တိမ်းရှောင်သွားကြောင်းနဲ့ တချို့လည်း အသက်ကြီးလို့ ကွယ်လွန်ကုန်ကြပြီဖြစ်ကြောင်း သူ့ခေတ်နဲ့သူ အားလုံးက သတိရနေကြောင်း သိထားသလောက် ရှင်းပြရတယ်။
ပြီးတော့... ငါတို့ သတင်းစာက မဖတ်ချင်တဲ့ စာမျက်နှာက များပြီး ၊ ဖတ်တဲ့အခါမှာလည်း နောက်ကျောဘက်ကသာ စပြီးဖတ်ကြကြောင်း ပြောပြတော့ သူတို့ အံ့သြနေကြတယ်။ သတင်းစာကို လူတွေက ဝယ်ကြတယ်ဆိုပေမယ့်... ဖတ်ကြပါတယ်လို့ မဆိုနိုင်ကြောင်းကို လူတွေ ဟာသရုပ်ရှင်ကားကြည့်ပြီး ရီမောတာကို ပျော်ရွှင်နေကြတယ်လို့ မဆိုနိုင်ကြောင်း ဥပမာပေးပြီး ရှင်းပြလိုက်တယ်။ သတင်းစာကို မဖတ်ဘူးဆိုပေမယ့် ပြစ်ပါယ်လို့မရကြောင်းလည်း သေချာရှင်းပြရတယ်။
အဲတော့... ရှေ့ဘက်က ဘာတွေရေးထားလို့ လူတွေက မဖတ်တာလည်း ထပ်မေးနေလို့.... ရှေ့ဘက်က သူတို့( အစိုးရ ) ဟန်းနီးမွန်း ထွက်တဲ့အကြောင်း၊ (စစ်ဗိုလ်ချုပ်တွေ အလှူလုပ်တာကိုသာ ဖော်ပြနေကြောင်း) ၊ Propaganda (ဝါဒဖြန့်ချီမှု) ကိုပဲ ဦးစားပေးထုတ်ဝေခဲ့ပြီး အဓိပါယ်မရှိကြောင်း ၊ နိုင်ငံတကာက အစိုးရတိုင်းဟာ သူတို့ရဲ့ ဝါဒတွေကို Convince( သိမ်းသွင်းစည်းရုံး ) လုပ်ပေမယ့် မြန်မာအစိုးရကတော့ အားလုံးနဲ့ ကွဲပြားပြီး ပြည်သူကို လုံးဝဂရုမစိုက်ကြောင်း ၊ သတင်းစာထဲမှာ တစ်တိုင်းပြည်လုံး မီးတွေလင်းပြီး အပြင်မှာတော့ မဲမှောင်နေကြောင်း၊ ပြီးတော့... သတင်းစာထဲမှာ အရာရာတိုင်း Okay တယ်လို့ ရေးထားပြီး အပြင်မှာနဲ့ လုံးဝကွဲပြားကြောင်း၊ စာမျက်နှာ ၃၈ မျက်နှာပါရှိပြီး ကြော်ငြာကဏ္ဍများကြောင်း ၊ နိုင်ငံတကာသတင်း ဖော်ပြရာမှာလည်း ဘာမှ ဗဟုသုတ မရကြောင်းနဲ့ မင်းတို့လိုပဲ နိုင်ငံတကာကလည်း လေးစားပါတယ်လို့ ပြောတဲ့ "ဒေါ်အောင်ဆန်းစုကြည်" အကြောင်းကိုလည်း တစ်သက်လုံး မဖော်ပြဘဲ စော်ကားတဲ့ ကာတွန်းတွေနဲ့ အရေးအသားတွေကို အမြဲဖော်ပြတတ်ကြောင်း ရှင်းပြရတယ်။ (သတင်းစာ မဖတ်တဲ့အကြောင်းမေးတာကို အဲလိုပဲ ပြောပြခဲ့တယ်)
ပြီးတော့... သတင်းစာက အဲလိုဖော်ပြပေမယ့်လည်း အစိုးရကို ဝေဖန်ထောက်ပြမိရင် ထောင်ဒဏ်နှစ်ရှည်သလို သေဒဏ်လည်း ကျနိုင်ကြောင်း၊ တရုတ်အစိုးရနဲ့ တချို့နေရာတွေမှာတူကြောင်း ရှင်းပြလိုက်တော့ မြန်မာတွေ သတင်းစာ ဖတ်တာနဲတဲ့အကြောင်း သူတို့ သဘောပေါက်သွားကြတယ်။
ခုလို... ငါပြောနေတာတွေကလည်း မြန်မာနိုင်ငံသား အားလုံးကို ကိုယ်စားမပြုဘဲ ငါ့အမြင်ကို ပြောနေတာပါလို့ ပြောပြလိုက်ရတော့ တစ်ယောက်က ထပ်မေးတယ်။ ခုအစိုးရကရော( ဦးသိန်းစိန်) ဘယ်လိုလဲတဲ့။ (ဦးသိန်းစိန် စင်ကပူကို လာပြီးသွားပါပြီ)သူ့လက်ထက်မှာထုတ်တဲ့ သတင်းစာကရော Okay ပြီလားတဲ့?။
အဲဒါတော့... ငါလည်း ဒီမှာရောက်နေလို့(စလုံး) သေချာမသိပါဘူး။ ဒါပေမယ့် အမှိုက်ထုပ်ထဲမှာ သတင်း စာမပါတာခြင်းကတော့ တူနေပြီဆိုရင်....... အဲလိုပဲ ပြောရသေးတယ် သူတို့ နားလည်သွားပြီတဲ့လေ။ ပြီး... လေယာဉ်သွားရအောင်လို့ ပြောပြီး စကားဖြတ်လိုက်ပေမယ့် Parking Bay မှာတော့ မြန်မာသတင်းစာနဲ့ သူတို့ရဲ့ လုပ်ဖော်ကိုင်ဘက်ကောင်းတွေဖြစ်တဲ့ ကျနော်တို့ အကြောင်းကို သူတို့အချင်းချင်း ပြောနေကြလေရဲ့။
တကယ်တမ်းဆို သတင်းစာဖတ်ခြင်းရဲ့ အကျိုးကျေးဇူးတွေ များစွာရှိခဲ့ပေမယ့် မြန်မာသတင်းစာက မြန်မာနိုင်ငံသားတွေကို ခုချိန်ထိတိုင်အောင် ဘာမှကောင်းကျိုး မပေးခဲ့ခြင်းကလည်း သူတို့ရဲ့ အတင့်ရဲလွန်းလှတဲ့ စေတနာပါပဲ။ မထင်မှတ်ဘဲ နိုင်ငံတကာသတင်းစာတွေ စုပုံနေတဲ့ နေရာမျိုးမှာ မြန်မာသတင်းစာ တစ်မျိုးတည်းက ထူးခြားပြီး Colour မပါဘဲ အဖြူအမဲနဲ့သာ တည်ရှိနေခြင်းကလည်း လူအများကို အံ့သြစေခဲ့ပါတော့တယ်။ ဒါဟာလည်း လေယာဉ်ကွင်း တစ်နေရာလေးဆိုပေမယ့် လူအရမ်းများပြီး နိုင်ငံသားအစုံ သတင်းစာအစုံ ရှိတဲ့အတွက်ကြောင့် နယ်ပါယ်ကကျယ်ပြန့်ပါတယ်။
အဲဒီအချိန်က သူတို့ကို လှည့်စားပြီး ပြောခဲ့ရင်လည်း ကိုယ်က "ငပေါ" ဖြစ်မှာသေချာတယ်။ မြန်မာလေယာဉ်က အမှိုက်ထုပ်ထဲမှာ သတင်းစာမပါတော့ သူတို့အနေနဲ့ thinking ဖြစ်နေပါတယ်။ ခုတော့... ကျန်တာတွေခဏ ဘေးဖယ်ထားပြီး သတင်းစာချင်း ယှဉ်မယ်ဆိုတောင် မယှဉ်နိုင်ခဲ့လေတော့... အားငယ်စွာနဲ့ ပြုံးပြခဲ့ရတော့တာပေါ့။ အဲဒါက ကျနော့အတွက် တစ်သက်လုံး မမေ့နိုင်တော့တဲ့ စင်ကပူလေယာဉ်ကွင်းထဲက သူတို့စိတ်ဝင်စားတဲ့ မြန်မာသတင်းစာ အကြောင်းပေါ့။
( မှတ်ချက်# တခြားမြန်မာ သူငယ်ချင်းတွေကတော့ သူတို့ဘယ်လို ရှင်းပြလည်း ကျနော်မသိသလို ဒီအကြောင်းကို ရေးသားဖော်ပြခြင်းကိုလည်း မတွေ့ဘူးပါ ) ဖတ်ပေးသူများကို ကျေးဇူးတင်ပါသည်။