ပြောပြချင်တဲ့ စကားတွေ။
မခင်ဦး။
( ၂၂၈)
ကျွန်မတို့နိုင်ငံမှာ မျိုးစောင့်ဥပဒေဆိုတာကြီးပြဌာန်းဘို့
တောင်ပြောမြောက်ပြော အရူးတယောက်လို ပြောစရာလိုသလား မလိုသလားဆိုတာ
စဉ်းစားစရာပါ။
လူမျိုးအနေနဲ့စောင့်ရမှာလား။ ဗုဒ္ဒဘာသာအနေနဲ့ စောင့်ရမှာလာ။ ဘာကို ဘာအတွက် ဥပဒေထုတ်ပြီး စောင့်ရမှာလဲတော့ မသိပါဘူး။
ကျွန်မတို့ရဲ့ သမိုင်းမှာခေတ်အဆက်ဆက် ဖြတ်သန်းခဲ့ပါပြီ။
အင်္ဂလိပ်လူမျိုးခြားလက်မှာလဲ နှစ်ပေါင်းတရာကျော် နေခဲ့ပြီးပြီ။
ဆရာတော်သမားတော်ကြီးတွေ ခေတ်အဆက်ဆက် ဘုရားအဆုံအမနဲ့အညီ နှစ်ပေါင်း
များစွာကြိုးပမ်းလာကြတဲ့တရားဓမ္မတွေကြောင့်
အမျိုးပျက်သွားတယ်လို့လဲသတိမထားမိသလို ဘာသာပျက်သွားတယ်လို့လဲ
မကြားမိခဲ့ပါဘူး။
အင်္ဂလိပ်လက်ထက်မှာ လယ်တီဆရာတော်ဘုရားက
အင်္ဂလိပ်ထုတ်ပြန်တဲ့ နွားသတ်လိုင်စင်ကိုဆန့်ကျင်ပြီး နွားသား(
အမဲသားမစားရေးသပိတ်လုပ်ခဲ့ဘူးတာတော့ရှိပါတယ်။
ဒါပေမဲ့ လယ်တီဆရာတော်တို့ ကြီးကြီး ကျယ်ကျယ် မျိုးစောင့်ဥပဒေ ထုတ်ပြန်မယ်တော့ လုပ်ခဲ့ကြပါဘူး။
ကျွန်မတို့ မိသားစုအနေနဲ့ မိဘကငယ်စဉ်မှာ အမဲသားကိုအားရှိအောင်ဆိုပြီး
ကျွေးလို့စားပါတယ်။ ကြီးလာတော့ နွားများကို ကြင်နာသနားတဲ့ အနေနဲ့
မစားဖြစ်တော့ပါဘူး။
အစဉ်အလာအားဖြင့်တော့ ဗုဒ္ဓဘာသာထိန်းသိမ်းစောင့်ရှောက်ဘို့ ဆရာတော်ကြီးတွေ ကြိုးပမ်းခဲ့ကြတာက တော့ နည်းလမ်းအတော်ကျပါတယ်။
လယ်တီဆရာတ်ေဘုရားဆိုရင် ပါဠိဘာသာနဲ့သာရှိတဲ့ ဗုဒ္ဓကျမ်းစာတွေကို
မြန်မာလိုရှင်းလင်းစွာ ရေးသားခဲ့ တယ်။ မိုးကုပ်ဆရာတ်ေဘုရားဆိုရင်
ပဋိစ္စသမုပ္ပတ်တရာေးတ်ာတွေကို စက်ဝိုင်းတည်ထွင်ပြီး သံသရာလည်ပုံ ကို
သာမာန်လူတွေနားလည်အောင်မနေမနားကြီးစားပြီးတရားဓမ္မတွ ဟောကြားခဲ့တယ်။
တရားဓမ္မကိုသွန်သင်ဆုံးမတာကို ငယ်စဉ်ကပင်ကျွမ်းဝင်စေခြင်းကသာ တကယ့်မျိုးစောင့်တရားပါ။
မျိုးစောင့် ဥပဒထုတ်တာဟာ မျိုးစောင့်တရားလို့ မထင်မိပါဘူး။
ကျွန်မတို့ မြန်မာလူမျိုးတွေ မျိုးစာင့်တရားမှာ အရင်ကလဲမညံ့သလို အခုလဲမညံ့ပါဘူး။ ချွင်းချက်ဆိုတာကတော့ ဘယ်အရာမဆို ရှိတတ်ပါတယ်။
အခုအချိန်မှာလဲ မြို့ပြကျေးလက် နေရာဒေသအနှံအပျားမှာ တရားပွဲတွေ
လမ်းတိုင်းလမ်းတိုင်း လုပ်နေကြတာ မျိုး ၊ တရာ့းပွဲချင်း ဆက်နေတာပါဘဲ။
ဆရာတော်ကြီးတွေ ဖွင့်လှစ်သင်ကြားနေတဲ့ ယဉ်ကျေးလိမ်မာသင်တန်း တွေကလဲ
နွေရာသီဆိုရင် ချိမ့်ချိမ့်သဲပါဘဲ။
ဆရာတော်ဦးဥာနိသရရဲ.
တက္ကသိုလ်ကျောင်းတော်ကြီးမှာဆိုရင် နိုင်ငံခြားသားတွေတောင် ဗုဒ္ဒဘာသာကို
ရာနဲ့ချီတဲ့ ကျောင်းသားတွေ လာသင်နေကြတာပါ။ သာသနာပြုရာမှာ
ဓမ္မနဲ့ညီတယ်ပြောရမယ်။ တကယ်ကို အားကျေနပ်စရာပါ။
ကျီးသဲလေးထပ်ဆရာတော်ဘုရားကြီးရဲ.ဇီနတ္တပကာသနီကျမ်းအစမှာ ဆရာတော်အမှာရေးတဲ့ထဲမှာ ဆင်းရဲမွဲတေခြင်းက အရာရာကိုဆိတ်သုဉ်းစေတယ်တဲ့။
တကယ်တာ့ တိုင်းပြည်ဆင်းရဲမွဲတေနေရင် မျိုးစောင့်ဥပဒေဘယ်လောက်ထုတ်ထုတ်
မျိုးမစောင့်နိုင်ဘူး ထင်ပါတယ်။ အခုတောင် မြန်မာမိန်းကေလးတွေ
တရုတ်ပြည်ကိုသွားပြီး တရုတ်လယ်သမားရဲ. ကလေး မွေးပေးနေရတဲ့
အနေအထားဖြစ်နေတယ်။
တရုတ်ဘက်က ဈေးကောင်းရလို့။ တရုတ်မဟုတ်လဲ ဘင်္ဂလားဒက်ရ်ှက ငွေပိုပေးရင် သွားကြမယ်ထင်မိပါတယ်။
အခု ထိုင်းဘက်မှာ မြန်မာပြည့်တန်စာမိန်းကလေးတွေ ဘယ်လောက်ရှိနေသလဲ။
အရည်အတွက်တောင် မသိဘူးထင်ပါတယ်။ အဲဒါ ဆင်းရဲမွဲတေမှု၊ အလုပ်အကိုင်ရှားပါးမှုကြောင့် မျိုးမစောင့်နိုင်တာပါဘဲ။
မျိုးစောင့်နိုင်ဘို့ ချမ်းသာကြွယ်ဝတာမဟုတ်ရင်သော်မှ ဆင်းရဲမွဲတေနေလို့
မဖြစ်နိုင်ပါဘူး။ ဆင်းရဲမွဲတေခြင်းကသာ အရာရာကိုဆိတ်သုဉ်းစေမှာပါ။
အခုအချိန်ဟာ နိုင်ငံအပြောင်းအလဲ ဖြစ်တည်ဘို့ တာစူနေချိန်မှာ ဆင်းရဲတွင်းက လွတ်မြောက်ရေးကိုသာ ပထမ ဦးစားပေးဦးတည်သင့်တယ်။
အခုပြည်တွင်းမှာ ထကြွသောင့်ကျမ်းနေတဲ့ နောက်ပြန်ဆွဲအတွေးအခေါ်တွေဟာ နိုင်ငံတကာဆက်ဆံရေး အတွက် အတော်လေးကို စိတ်ကသိကအောင့်ဖြစ်စရာပါ။
ကျွန်မမှတ်မိနေသေးတယ်။
ကျွန်မတို့ငယ်ငယ်က ကျွန်မတို့ ညီအမတွေ တက္ကသိုလ်တွေတက်ကြ။
သင်တန်းတွေတက်ကြချိန် ဘောင်းဘီရှည်ဝတ်တယ်ကြားလို့ ခေတ်မမီတဲ့
ဘကြီးဘုန်းကြီးတပါးက ကျွန်မတို့ ညီအမတွေကို ( ကွန်မြူနစ်မ တွေ ငါ့ကျောင်းထဲ
မ၀င်နဲ့။) ပြောခံရတာ သတိရမိတယ်။
အခုလဲ အဲဒီလို အချိုးဖြစ်နေတယ်။
အလုပ်အကိုင်တွေပေါများပြီး ၀င်ငွေထွက်ငွေတွေ၊ ဘ၀လုံခြုံမှုတွေရှိလာပြီး
မိမိနိုင်ငံကသူများထက်သာလာရင် အမျိုးကိုစောင့်ပြီးသားအလိုလို
ဖြစ်လာပါလိမ့်မယ်။
ဆင်းရဲမွဲတေနေရင်တော့ ဥပဒေမကလို့ စစ်တပ်နဲ့စောင့်၊ ဒုတ်-ဓားထမ်းစောင့်လဲ မရနိုင်ပါဘူး။
မျိုးစောင့်ဥပဒေလုပ်ချင်တယ်ဆိုတာကတော့ ရူးသွပ်မှုတခုဘဲလို့သာပြောပါရစေ။
( ၁၆-၆-၁၃
No comments:
Post a Comment